Avropa futbolunda günün nəticələri: “Çelsi” məğlub oldu, “İnter” finalda, “Lans” yüksəldi, “Real” qalib gəldi

Avropanın aparıcı futbol çempionatları və kuboklarında növbəti oyunlar keçirilib və bir sıra maraqlı nəticələr qeydə alınıb.

"PostMedia" xəbər verir ki, İngiltərə Premyer Liqasının 34-cü turunda Londonun “Çelsi” klubu səfərdə “Brayton”a 0:3 hesabı ilə məğlub olub. Meydan sahiblərinin heyətində Ferdi Kadıoğlu, Cek Hinşelvud və Denni Uelbek fərqləniblər. Bu nəticədən sonra “Brayton” 50 xalla 6-cı, “Çelsi” isə 48 xalla 7-ci pillədə qərarlaşıb.

İtaliya kubokunda “İnter” yarımfinal mərhələsini uğurla keçərək finala yüksəlib. Milan təmsilçisi cavab oyununda “Komo”nu 3:2 hesabı ilə məğlub edib. Görüşdə Hakan Çalhanoğlu dubl edib, qələbə qolunu isə Petar Suçiç vurub. İlk oyun 0:0 hesabı ilə başa çatmışdı.

Fransa kubokunda “Lans” finala vəsiqə qazanıb. Komanda yarımfinalda “Tuluza”nı 4:1 hesabı ilə məğlub edib. Finalın digər iştirakçısı “Strasburq” və “Nitsa” arasında müəyyənləşəcək.

İspaniya La Liqasının 33-cü turunda isə Madridin “Real” klubu öz meydanında “Alaves” üzərində 2:1 hesablı qələbə qazanıb. Qolları Kilian Mbappe və Vinisius Junior vurublar. “Real” bu qələbədən sonra 73 xalla ikinci pillədə yer alır.